陈自瑶操fit保持身材抗小三食硬王浩信
2023-05-10 14:56:27呢排个个“天眼通”上身，猛话攞硬视帝嘅王浩信同陈自瑶（YoYo）婚变，话佢哋又冷战又分居，生猪肉狂砌，传到离晒罩！搞到YoYo要两度胸撑老公，发表讲话以释公众疑虑，讲明两公婆冇问题，仲话会用汤水为争视帝嘅老公打气！我Nuts哥都有问人点解相信婚变传闻， 唔知仲以为佢哋两公婆张床大过城门水塘，个个都瞓喺床下底咁分析大市！实情啲人讲嚟讲去三幅被，不外乎话王浩信冇时间陪老婆、为追仔嘈交，当然唔少得话佢逢女都啱，咁就咬定人哋婚变，大镬啦！
人人都返工，唔通人人都想返工咩！但唔使搵食呀？如果日日陪住老婆仔女，懒过条蛇，咪又畀人闹系废柴？剧接剧忙到连陪个女小一面试都冇时间，点样沟女先？你可以话偷食嘅嘢，快有快啅，慢有慢叹，只在乎曾经拥有，但日日开工，乜都Chur乾、脚仔都软啦！无啦啦塞个蔡思贝做“小三”，对方都惨啦，乜都冇做过又赖嘢，就连无綫咪神陈伟琪都被拖落水，王浩信讲明“而我不知道陈伟琪是谁”，咁你话胸怀大志嘅陈伟琪几Hurt呢？
保住“C奶”打圣战
最九唔搭八，就系王浩信冇Like太太个Post都系罪！早排林盛斌（Bob）寸老婆三更半夜披头散发去换片，惊吓度十足，Bob嫂就还拖，窒老公瞓觉成条浮尸咁，望佢似瞻仰遗容！阿Bob又咪冇时间陪老婆兼公然互片，又唔见话佢婚变？唔通冇头发冇咁靓仔，就冇资格偷食？我非常同情王浩信，暖男无端端变贱男，唔通真系要两公婆直播，或者宣誓先至信？如果我系王浩信，兜巴星你埋墙啦！话晒人哋有个女，小朋友听到呢啲传闻会点谂？就算老窦攞埋奥斯卡影帝都补唔番啦！
小三、小四、出租女友一街都系，惊另一半偷跳？咁就要睇大婆“食力”喇！拖住老公辟谣、一副“Yo！使乜惊！”嘅YoYo享有高度自治权，由大厅行到上大床，360度全方位食硬老公！先讲副偈，36岁嘅佢仲Keep到C Cup身材、21吋蛇腰，零师奶味，同当年拍《四叶草》时一样又Pure又True，完胜其他妹妹仔，乜嘢邪花都弹开啦，正如佢讲过：“女人唔可以懒！”你估净饮斋坐就索咩？佢好似打圣战咁，泰拳、瑜伽、羽毛球等等乜都做，日日敷Mask，未计做家务同开工拍剧，一日24小时当48小时用！
派福利血流成河
为幸福而战嘅YoYo日操夜操，操到班网民猛话睇到㷫合合，佢旧年仲同陈炜拍剧玩“SheShe吻”，亲尝“炜哥的味道”，够晒重口味！佢哋之后仲拍住上，喺台庆跳埋肚皮舞，YoYo同炜哥比简直冇得输，连黄宗泽同马国明都直竖拇指！王浩信就忍唔住晒命，开心Share帮老婆影嘅水着相，摆明有好嘢益街坊，网民狂呼睇到血流成河！
王浩信可以成年唔放假，专心拍戏拍到攞视帝，冇YoYo呢个大后盾点得？佢凼奶奶、凑女一样掂，贴地悭家，应使得使，王浩信都讲过送袋畀老婆，佢会面黑㗎，情愿买楼畀佢仲实际！咪以为YoYo先系Final Boss，其实王浩信先系，有名你叫Signal Wong，即系“食脑王”，识拣老婆，就等于修身齐家治国平天下，所以你话拣老婆几咁重要！
点阅读原文